NG’ARAGU NENE KUHURA HONDI KAUNTI-INI YA NYERI
Written by Kayu Official Digital on February 4, 2026
- NAIROBI & ENVIRONS 91.0 | MT KENYA REGION 91.1FM
Matuura mamwe kaunti-ini ya Nyeri nimathiite nambere na kugumirwo ni ng’aragu nene ona thengia ya gukorwo iri kaunti imwe iria iri na ihumo nene cia maai na njui nyingi.
Wandi cia Gakawa, Mugunda, Endaraca na Thigu ni imwe iria cihutitio gicigo-ini kia umbunge gia Kieni ni kumwe aikari makoretwo makihutio na njira nene ni ng’aragu ino.
Kuringana na ruhonge rwa kung’ethanira na ng’aragu ndarini cia ica ikuhi cionanitie ati kaunti ya Nyeri miena imwe ni ikoretwo ikigumirwo ni unyihu wa maai.
Murugamiriri wa ruhonge ruru Abdi Abdi Rahman augite ati ndeto ino ni ikwambatiria thogora wa indo, wagi wa irio cia mahiu hamwe na kwambatira gwa ciiko cia wuici.
