THIRIKARI KUNYAGIA MIUNGURWA YA KAHUA KURI ARIMI NIGUO KUONGERERA MAGETHA
Written by Kayu Digital Team on April 21, 2025
- NAIROBI & ENVIRONS 91.0 | MT KENYA REGION 91.1FM
Ari ta njira ya kwarahura thekita ya urimi wa kahua bururi-ini, thirikari ni iigite ciringi mirioni 500 banjetini ya muhohio niguo guteithiriria uciarithania na utambia wa miungurwa ya kahua kuri arimi bururi-ini.
Mwandiki mukaru ministry-ini ya Thothaiti, Patrick Kilemi augite kigina giki gitanyitwo guteithiriria utambia wa miungurwa mirioni 20 kuri arimi na iria augite iri na uhoti wa kuhe murimi maciaro ma kilo makiria ma miringo ina hari oro gita gia kahua.
Kilemi Aritie maya ari kaunti-ini ya Murang’a, akiuga guthii nambere thirikari irenda magetha ma kahua mambatirire ukiringithania na uria makoretwo na oho mateithiririe arimi guthengia miti ya kahua iria mikuru na itari na umuthio, thirikari igitanya guthii nambere na kuongerera umuthio wa kahua thoko cia nanja ukorwo ugikinyithia makiria ma ciringi tiririoni imwe kuuma ciringi mbirioni 33 na iria arimi monire mwaka-ini wa 2023.
