MUINGI GUTHONJERA KOMICHINA WA NYANDARUA NA MIARIO AGITHOMA NDUMIRIRI YA PRESIDENT

Igongona ria gukunguira maambura ma Jamhuri kihaaro-ini kia Engineer mwena wa Kinangobu kaunti ya Nyandarua nirigumiirwo ni githagathago thutha wa muingi guthonjera komicona wa kaunti ya Nyandarua Abdirizak Jardesa riria aguthomaga ndumiriri ya mutongoria wa bururi William Ruto.

Muingi utumurire gicanjama kiu oona thutha wa guthaithwo ni Ngabana wa Nyandarua Dr. Kiarie Badilisha kugia na ukiriria .

Mbere ya gicanja kiu kuumira MCA wa Engineeer Mwangi wa Gichuki na murunawe wa Njabini Kiburu Kiiru wa Gachomba makiaria hindi ya igongona riu nimarutire thirikari ya Kenyan Kwanza na njira nene makiuga ni ithiite mugaru na ciiraniro na mwihoko wa aikari a gitaru gia gatagati, makigweta imwe cia tabarira iria citakinyaniirio ni thirikari nene Nyandarua.

Thutha wa Ngabana Kiarie Badilisha kwariria muingi na gutaariria tabarira iria cikinyaniirio ni thirikari yake, ambire guthaitha muingi ugie na ukiririria na uthikiririe ndumiriri ya President no muingi wamukararia na guthonjera komicona na namba nene yao kuumururuka giikaro-ini kiu.

Maabitha a ugitiri o hamwe na a wathani wa matuura nimahiukire na kurigiciria komicona ucio o magithaithaga muingi ugie na uhoreri no thengia ya macio komicona ucio aumanirie na guthoma ndumiriri iyo muuingi o ukinegenaga.

Muingi utariirie ati umururukire giikaro ini kiu kuumana na thirikari nene gukorwo ihatiriirie muingi na njira nene na kuheana ciiraniro citarahinga.