Sebastian sawe kuuga e ceba kumathira kenya ngoga ya thahabu, mahenyaini ma Prague half marathon jumamothi ya kiumia giki

Kiumia kimwe thutha wa njorua ya uguthuki wa mahenya ma gutua ng’ongo guku bururiini Sebastian sawe kurirukia bendera ya kenya mahenyaini ma thi ng’ima ma world cross country championship, maria maguthukagirwo mwena wa belgrade bururiini wa serbia, riu mumbuthuki uyu augiite e ceba kumathira kenya ngoga ya thahabu, mahenyaini ma Prague half marathon jumamothi ya kiumia giki. Sawe na uria wonirio rukungu mahenyaini world cross country championship na kuminjio nginyagia ithenyaini ria 8, augiite ndangirira kuhitwo mahenyaini maya, kuona ahuthirire mweke uyu ta njira ya guithagathaga, akiuga riu kuumana na uguo ena mayu maiganu ma gukandikithia uhotani weekend ino. Sawe uria niwe njorua ya thi ng’ima mahenyaini ma half marathon, na uria nowe njorua ya bururi ya mahenya ma gutua ng’ongo, ena umenyo munene wa uria agiriirwo kuhiuka mahenya ma 21km, uria amathire thutha wa kuhiuka ndiira igitoga na kuhiuka na uhotani mahenyaini ma Berlin half marathon mwaka muhituku
Weekend Mahenyaini ma prague, sawe uria wandikithiitie thimindi yake ya iguru ya dagika 58:29,agakorwo agithimana maahinya na murunawe Geofrey toroitich uria wina thimindi njega ya dagika 59:13 na mwenyeri wa bururi wa uganda Gideon Kiprotich na maxuel Rotich gatagati ka angi.

Mwena wa nyarari, Jesca Chelangat na Vivian Melly magakorwo makihitahitanira ngoga na aguthuki a Ethiopia Nigsti Haftu na Gete Alemeyehu.

Kungi nakuo njorua ya bururi ya mahenya ma Napoli Marathon Angela Tanui, agakorwo mwena wa South Korea muthenya wa kiumia, akirirukia bendera ya kenya mahenyaini ma Daegu Marathon.