ONJORIA A JUA KALI GUCARIRIO MUGUNDA WA KURUTIRA WIRA THIKA
Written by Kayu Digital Team on January 19, 2024
- NAIROBI & ENVIRONS 91.0 | MT KENYA REGION 91.1FM
Ari ta njira ya guthairira onjoria a Jua Kali tauni-ini ya Thika kaunti ya Kiambu, ngabana wa kaunti ino Kimani Wamatangi nieraniire gukinyaniria mutaratara wa gucaria mugunda uria onjoria aya marihuthagira wira-ini wao matekwagagio.
Akiaria hindi ya igongona ria kuheana bursary ya mathomo wardi-ini ya Hospital mwena wa Thika, Wamatangi augite gugikinyithia mweri wa kana mwaka-ini uyu thirikari yake ni igukorwo icaritie mugunda wa onjoria aya na kumaruta mikira-ini ya barabara-ini na iria makoretwo makirutira wira kwa ihinda riri.
Ikinya riri riukite thutha wa onjoria gukorwo makigiika kwa ihinda thutha wao kurutururwo haria marutagira wira kugerera watho wa igoti kumana na ciira uria wahandititwo igoti-ini ni kanitha, onjoria aya makiria ma 3,000 riu magitanywo kuhumuka mathina maria maragerera ihinda-ini riri.