SAKAJA; NITWIHARIRIE KUHITANA NA EL NINO

Rîrî ruhonge rwa urathi wa riera ruheanite mukana wa mbura ya muniko bûrûri-inî guthii nambere guthandana, muingi wa kaunti ya Nairobi niuthingatitwo wikirire hari gwithemana na gute giko mitaro-ini ya maai ma giko na îrîa ikoretwo igitherio niguo kuhotithia gutherera kwa maai ma mbura na njîra ina uhuthu.

Ritana rîrî rikitio ni Ngabana wa kaunti ya Nairobi Johnson Sakaja hîndî ya igongona ria kûrekereria maabithaa a kanju a Kuhitana na mogwati ma miaki gicigo-ini kia Mowlem, Nairobi kuria ahinyiririe aikari a Nairobi kuhimbiria ritana ria guikara haraya na kuria gukoragwo na mwaraho wa maai oro hamwe na njîra-ini ciamo niguo guteithiriria uhuthu wa maai ma mbura gutherera na kugerera mitaro iria ikoretwo igitherio matura-ini ni gikundi kia Green Army.

Maya mokire rîrî nake muikariri giti wa kamitii ya Kuhitana na mogwati ma mbura ya El Nino kaunti-ini ya Nairobi Bramwel Simiyu atugiritie wira uria ukoretwo ukirutwo ni gikundi kia Green Army na kiria githukiirwo wira ni thirikari ya kaunti ya Nairobi gutheria matura, akiuga wira wa gikundi giki matura-ini ni uteithitie makîria hari kuhingura mitaro na uguo kuhotithia gutherera kwa maai ma giko na uhuthu makîria mahinda maya mbura ya mwaraho ikoretwo ikihutia bûrûri.