RUTO NA IGOTI GUTHIMANA MAHINYA KUGERERA BUNGE

Mbara cia guthimana mahinya gatagati ka ruhonge rwa wathani na ruria rwa magoti ikirie kuririmbuka weru thirikari-ini uu ari thutha wa thirikari unyitaniri na bunge kuonekana kung’athiria watho wa igoti wa kugereka kabiru na kuyukia riendikithia ria thirikari ria gutuma maabithaa a borithi 1,000 bururi-ini wa Haiti kuiga thayu.

Thiini wa ciikaro cia bunge miaraho ya umuthi na iria ciuma na urugari gatagati ka mwahu wa aria aingi na aria anini, igeria ria mutongoria wa aria anini Opiyo Wandayi ria kuenda kurugamia ndereti ya gutuma maabithaa a borithi nirikobobanirio ni spika akiuga watho wa igoti ndungigiria bunge kwariria maundu mayo, kuria Wandayi ekiriire nganja mubango uyu akiuga umanitwo thutha wa wendi wa kuamba maabithaa a ugitiri kigeri-ini gia gikuu bururi-ini wa Hiati.

Onagukiri uguo agitetera ikinya ria thirikari ria gukunjura maabithaa aya bururi-ini wa Haiti, mutongoria wa aria aingi Kimani Ichung’wa nioririe mung’ethaniro wone mbica nene ya bururi ukinyitanira na thi ng’ima hari uigi thayu mabururi-ini mangi, riu gikiro gia keri hari wendi wa thirikari gikirorererio bunge-ini ya senate na iria nao no nginyagia ihetukie mutaratara uyu, maya mothe magiuka riri igoti ciira-ini uria uhanditwo ni Ekuru Aukot kugerera mucirithania Chacha Mwita rigathikite tareki 26 mweri wa njanuari taguo muthi wa gutua wa ciira wa mubango uyu wa gutuma borithi 1,000 Haiti wa thirikari.