Ciiko cia akenya kunyitwo migwate na njira iri na kiriga na gukiirikana ni maobithaa a borithi nithiite na mbere na kwihiriria

Ciiko cia akenya kunyitwo migwate na njira iri na kiriga na gukiirikana ni maobithaa a borithi nithiite na mbere na kwihiriria. Muthenya umwe thuutha wa mwonjoria Ann Njoroge kuonekana thuutha wa kuura kwa ihinda ria thiku 5 na kuria augiite ni maobithaa a borithi maramunyitiitwe migwate – riu nake uria waari MCA wa South C Osman Khalif na uria ni muteithiriria wa Gabana Johnson Sakaja onake niarikiitie kunyitwo migwate ni andu matoikaine . Kwirikaniite Khalif anyitiriirwo migwate mwena wa Westlands riria maari na andu a nyumba yake na kuria ahithukiirwo ni andu methaiite na micinga na makimuikia ngaari-ini muthemba wa Pick-up.
Kuumana na kunyitwo migwate kwa Khalif riu abunge a gicigo giki kia Rugongo rwa bururi riu makiuria thirikari gutariria kuria khalif ari na makorwo makimurekereria na angikorwo ari na mahitia akorwo agikinyithio mbau-ini. Oho no mamenereirie ciiko cia ica ikuhi cia unyitani wa migwate.