“ABITHAA” WA MAHENI WA EACC GUIKIO NGONO

Kamitii ya kurua na ungumania EACC nirikitie guikia ngono mwikuirwo umwe na uria ukoretwo ukihenia andu ati ni muthuthuria munene wa ruhonge ruru na oho gukorwo ari hakuhi na murugamiriri munene wa kamitii ino Twalib Mbarak.

Shadrack Kariira Ndegwa akoretwo akihenia andu ati ari na uhoti wa guthengia macira ma ungumania oro kana kumathiora na makiria maria makoretwo ruhonge-ini ruru, na uguo kuoya mweke uyu kubora andu mbeca kugerera maheni maya.

Makiria ma uu, EACC kugerera munini wa murugamiriri munene Abdi Mahmud niyugite mwikuirwo uyu niakoretwo akihenia muingi ati no muruti wira wa ruhonge rwa utuiria wa kinyi kana NIS oro hamwe na ruria rwa uthuthuria, DCI kuria riu ari moko-ini ma borithi a ruhonge ruru rwa EACC Nairobi etereire gukinyio igoti-ini.